Rydym ni ar Gornel Gymraeg, Caernarfon Arlein  yn hynod falch o gael cyhoeddi rhestr lawn o’r gwobrau a dderbyniodd disgyblion Ysgol Syr Hugh Owen yn  Eisteddfod yr Urdd yn Rhuthun eleni. Mae’r rhestr ei hun yn brawf digonol o ymroddiad athrawon a disgyblion a fu’n ymarfer am fisoedd lawer i sicrhau y fath lwyddiant a gwyddom bod pobl tref Caernarfon yn gwerthfawrogi’n fawr maint eu llafur a’u bod yn haeddu pob clod am gyrraedd safon aruchel yn y cystadlaethau.

Dyledus ydym hefyd i Miss Lisa Roberts am gydsynio i anfon y rhestr inni ac am drefnu i un o’r disgyblion, Heledd Gwyn Lewis, i roi ar gof a chadw ei hatgofion hynod ddiddorol o weithgareddau’r wythnos. Mawr ddiolch iddynt.

T. Meirion Hughes, Golygydd, Cornel Gymraeg.

Eisteddfod yr Urdd 2006

1af – Côr Bechgyn Bl 13 ac iau, 1af – Ymgom Bl 7-9, 1af – Meinir Roberts – Unawd Alaw Werin Bl 10 – 13, 1af – Meinir Roberts a Ffion Llwyd – Deuawd Cerdd Dant Bl 10 – 13, 2il – Côr Bechgyn Bl 7 – 9, 2il – Côr SA Bl 7 – 9, 2il – Côr Cerdd Dant Bl 13 ac iau, 2il – Côr SATB Bl 13 ac iau, 2il – Elin Mair Jones – Llefaru Bl 10 – 13, 2il – Fferat - Grwp Pop dan 25, 3ydd – Dawnsio Disgo Bl 7 –9

Eisteddfod Yr Urdd, 2006.

Dydd Mercher, Mai 31, 2006.

Gwawriodd bore olaf mis Mai, ac roeddwn i wedi deffro ers 6 o’r gloch y bore. Wedi misoedd o ymarferion, roedd yr awr fawr wedi cyrraedd! Diwrnod cyntaf y cystadlu i mi. Wrth gwrs, roedd hi wedi bod yn ddigon gwlyb ac oer ar y maes, ond roedd yr haul wedi codi dros foel Fama ac yn tywynnu’n braf ar Ruthun y bore yma. Cyrhaeddais y maes am 7:30, a doeddwn i ddim wedi deffro’n iawn eto, ond i ffwrdd a mi i wylio rhagbrawf. Yn ôl traddodiad yr Eisteddfod, roedd y rhagbrofion yn rhedeg yn hwyr, ond cyn hir fe ddaeth y delyn i’r fei, a’r beirniad ddim yn bell ar ei hôl! Roedd yn braf cael eistedd yn ôl a bod y  feirniad ‘answyddogol’ am newid.

          Wedi hynny, fe es draw i gyfarfod criw yr ymgom. Wrth i’r nerfau gronni, cerddom draw at y rhagbrawf a phawb yn dechrau cnoi eu hewinedd yn dawel! O’r diwedd, fe ddaeth yr awr a chyfle i Sion, Lowri, Iestyn a mi weld os oedd y misoedd diwethaf o ymarfer wedi bod o werth o gwbl. Cefais bwmp o adrenalin ac roeddwn yn barod i fynd. Cysgododd y nerfau a daeth egni rhyfeddol o rywle. Aeth y perfformiad yn wych a’r pedwar ohonom- a Mrs Owens a Miss Lyall wedi cael gwefr ac yn falch iawn o’n gilydd.

          Gwasgarodd y criw o amgylch y maes anferth a phawb yn cael cyfle i weld y golygfeydd prydferth a chwilio am fwyd- wrth gwrs! Yna daeth neges i fy ffôn : “Dachi wedi cael llwyfan efo’r ymgom. Llongyfarchiadau! Cyfarfod gefn llwyfan am dri.” Neidiais mewn cynnwrf. Roedd cyrraedd y Genedlaethol wedi bod yn gamp yn ei hun, ond roedd cael llwyfan fel eisin ar y gacen. Cerddais o amgylch y maes tuag at gefn llwyfan am dri a phawb ohonom wedi gwirioni.

          Tarodd y nerfau fi fel ergyd gwn. Roeddwn i am fod yn perfformio ar y llwyfan, a hynny o flaen cynulleidfa fyw yn y pafiliwn, ac ar y teledu. Hedfanodd yr amser ac fe ddaeth ein hawr fawr i serennu. Ychydig funudau’n ddiweddarach, roedd y cwbl drosodd, a’r perfformiad wedi mynd yn wych a’r holl beth yn hollol wefreiddiol. Gwyddwn wedi hynny fod y canlyniad i ddod. Wrth aros gefn llwyfan, mi wnaethom ffrindiau newydd, sydd yn un o’r pethau pwysicaf am yr Eisteddfod yn fy marn i. Pwy oedden nhw, ond criw yr ymgom oedd yn cystadlu yn ein herbyn! Felly, yng nghanol y teimlad cyfeillgar fe gyhoeddwyd mai Ymgom Ysgol Syr Hugh Owen oedd yn fuddugol! Roedd y pedwar ohonom ar ben ein digon. Dyna ddiwrnod gwych drosodd ac mi es yn syth i fy ngwely- roedd diwrnod llawn cynnwrf a phrysur o fy mlaen yfory, a chychwyn cynnar unwaith eto!

Dydd Iau, Mehefin 1, 2006.

Cododd yr haul bore Iau, ac mi roeddwn ar fy nhraed am 6 y.b. unwaith eto! Roeddwn i wedi dod i arfer â’r holl godi cynnar-bron, ac mi roeddwn ar y maes cyn 7:30. Ymlwybrais draw at ragbrawf y Parti Cerdd Dant. Roedd aelod o’r parti wedi mynd ar goll ar ei ffordd yno, felly fe benderfynom aros amdani, gan sefyllian o gwmpas am dipyn. Wedi’r aros, cyrhaeddodd y ferch, ac i mewn â ni i’r rhagbrawf. Ar ôl canu, roedd yn rhaid brysio’n syth i’r rhagbrawf nesaf sef y Parti Merched. Aethom i mewn i’r rhagbrawf i weld ambell barti, ac wedi hynny fe aethom allan i gyd i gael dangos beth oeddem yn gallu ei wneud. Gwibiodd ein hamser i ddisgleirio a phawb yn brysur ar ôl hynny’n trafod ein perfformiad.

          Ymhen hir a hwyr, daeth y canlyniad siomedig-doeddem ni ddim wedi cael llwyfan efo yr un o’r ddwy gystadleuaeth. Felly, roedd cyfle i ni fynd o amgylch y maes am dipyn. Wedi llowcio fy nghinio, aethom am ragbrawf y Côr 7,8 a 9. Dwi’n credu fod canlyniad gwael wedi gwneud pawb o’r merched yn fwy penderfynol o wneud ein gorau a chael llwyfan. Ac mae’n rhaid ei fod o wedi gweithio! Do, fe gawsom lwyfan a phawb wedi gwirioni.

          Ar ôl crwydro’r maes am amser go hir, fe aethom i gefn y llwyfan a phawb wedi cyffroi ac yn barod i ganu ar y llwyfan. Fe aeth y perfformiad yn wych a’r nerfau wedi diflannu’n gyfan gwbl erbyn canol y darn, a’r teimlad o fwynhad llwyr wedi cymryd drosodd. Roedd pawb wrth eu boddau ac yn barod am y canlyniad. Er fod yna rhyw deimlad yng nghefn fy mhen fod y côr a ganodd drydydd yn well na ni, roeddwn dal yn awyddus i glywed y canlyniad. Yn anffodus, ail a gafodd ein côr, ond roedd pawb yn falch ein bod wedi gwneud cystal. Gwely cynnar eto, roedd yn rhaid deffro am chwech eto yfory! Yn sicr roedd diwrnod cyntaf mis Mehefin wedi bod yn ddiwrnod gwych.

Dydd Gwener, Mehefin 2, 2006.

Erbyn hyn roeddwn yn dechrau blino ar weld oriau o’r bore nad oeddwn yn arfer eu gweld! Unwaith yn rhagor, roeddwn ar y maes am 7:30. Pam oedd yn rhaid i fy rhagbrofion i fod mor gynnar bob bore? Ffurfiodd y Côr Cerdd Dant yn barod am y rhagbrawf ac i mewn â ni. Aeth y rhagbrawf yn wych a dim golwg o’r nerfau.

          Roedd awyrgylch gyfeillgar yno a phawb yn garedig. Yna, wrth grwydro’r maes, clywais fod y Côr Cerdd Dant wedi cael llwyfan. Wel am ‘Steddfod dda oedd hon wedi bod, ac rwan, roedd mwy i ddod! Roedd pawb yn fwy ymlaciol gefn llwyfan heddiw, mae’n debyg fod hyn i wneud efo’r tywydd braf! Wrth gerdded ar y llwyfan, curodd fy nghalon yn gyflym ac roeddwn yn nerfus gan nad oedd neb yn ein harwain. Ar ôl yr aros hir, fe ddaeth y canlyniad- 2il i Ysgol Syr Hugh Owen. Ddim yn ddrwg. Roedd hon wedi bod yn Eisteddfod dda, ac yn un llwyddiannus i Ysgol Uwchradd Syr Hugh Owen!

Heledd Gwyn Lewis Blwyddyn 9