Newyddion

Gorfennaf 2007

25 Gorffennaf

Mi fydd Bara Caws yn dathlu ei ben-blwydd yn 30oed yn y ‘Steddfod eleni. Tri deg mlynedd yn ôl llwyfannwyd sioe gyntaf Bara Caws - ‘Croeso i’r Roial’ yn Eisteddfod Genedlaethol Wrecsam. Eleni bydd y cwmni yn agor ei sioe glybiau newydd –

CAFFI BASRA gan Eilir Jones yn Eisteddfod Sir y Fflint a’r Cyffiniau - yn Y Wyddgrug Bydd y perfformiadau o Nos Lun 6ed o Awst hyd at Nos Iau 9fed o Awst am 8.00y.h. Gellir archebu tocynnau o Swyddfa Docynnau Theatr Clwyd 0845 3303565. Mae cludiant bws (am ddim!!) i gael o Faes y ‘Steddfod i Glwyd Theatr Cymru.

Yr actorion yw: IWAN CHARLES, GWENNO ELIS HODGKINS, EILIR JONES,DYFED THOMAS ac AWEN WYN WILLIAMS. Y cyfarwyddwr yw: TUDUR OWEN. EMYR REES sydd yng ngofal y gerddoriaeth. Dyma’r tro cyntaf i Iwan Charles weithio gyda Bara Caws a dyma’r tro cyntaf i Tudur gyfarwyddo i’r cwmni. A dyma’r tro cyntaf un i Eilir Jones sgwennu sioe glybiau!! Mi ymddangosodd Dyfed Thomas yng nghynhyrchiad cyntaf un y cwmni - ‘Croeso i’r Roial’ 30 mlynedd yn ôl!!!! Mae Dyfed yn teimlo bod hi’n fraint ac yn anrhydedd cael cyfle i weithio gyda Bara Caws 30 mlynedd yn ddiweddarach.

Yn dilyn y perfformiadau yn y ‘Steddfod mi fydd CAFFI BASRA yn teithio am gyfnod o bum wythnos o amgylch cymunedau’r gogledd (gweler rhestr y daith). Mi fydd rhaid i drigolion y de fachu ar y cyfle i weld y cynhyrchiad yn y ‘Steddfod!!!

Mae’r tocynnau yn gwerthu’n gyflym yng Nghlwyd Theatr Cymru, felly i arbed siom rydym yn argymell fod pawb yn archebu eu tocynnau o flaen llaw i’r Eisteddfod a hefyd i’r daith.

MAE LLUNIAU O’R CYNHYRCHIAD AR GAEL. OS OES ANGEN GWYBODAETH BELLACH YNGLYN Â CAFFI BASRA FFONIWCH LINDA 01286 676335

GWASANAETH DINESIG I NODI 700 MLYNEDD O ADDOLIAD YN EGLWYS Y SANTES FAIR
English version here

Heddiw, yr 11eg o Orffennaf, 2007, cynhaliwyd Gwasanaeth Ddinesig arbenning yn Eglwys y Santes Fair, Caernarfon, i nodi penblwydd yr Eglwys yn 700 oed eleni. Yn 1307 y rhoddwyd gorchymyn gan y Brenin i adeiladu’r Eglwys o fewn muriau’r hen dref a byth er hynny cynhaliwyd addoliadau yn ddi-feth ynddi.

Er bod Eglwys y Plwyf Llanbeblig lawer yn hyn ac yn dyddio’n ôl i’r 6ed ganrif, St. Mair yw’r Eglwys a gysylltir â gweinyddu’r dref ac â chyfraith a threfn er ei dyddiau cynnar a gwelwyd ymysg y gwahoddedigion gynrychiolaeth deg o rai sydd heddiw yn rhoi gwasanaeth clodwiw mewn gwahanol faesydd i’r gymdeithas.

Agorwyd y gwasanaeth drwy ganu’r anthem “Duw Gadwo’r Frenhines” ac yn dilyn gydag emyn Cymraeg “Molianned uchelderau’r nef”. Darllenwyd y llith gan y Parch Ganon Geraint Meirion-Jones ac ar ôl canu emyn Saesneg “All people that on earth do dwell” cafwyd anerchiad yn Gymraeg ac yn Saesneg gan y Rheithor, Y Parch Ganon R.F. Donaldson. Dewisodd destun o lyfr Eseciel gyda’r pwyslais ar bwysigrwydd gwylio a gwarchod ein cymdeithas, sylwadau a oedd yn hynod berthnasol i ni heddiw. Y Ficer, Y Parch Jeffrey Hughes a arweiniodd y darlleniad o’r Credo ac offrymodd Weddi. Yna canwyd yr emyn olaf “Un fendith dyro im”. Traddodwyd y fendith a chanwyd “Hen Wlad fy Nhadau” i diweddu’r gwasanaeth.

Yn dilyn, gwahoddwyd y gwahoddedigion gan Gadeirydd Cyngor Gwynedd, Y Cynghorydd Meinir Owen, i’r Pencadlys yn Stryd y Jêl am luniaeth.

T. Meirion Hughes.

10fed Gorffennaf

Annog landlordiaid i helpu i ostwng niwsans swn

Er gwaetha’r ymateb positif i’r gwaharddiad ysmygu a ddaeth i rym yng Nghymru ym mis Ebrill, mae Cyngor Gwynedd ynghyd â Heddlu Gogledd Cymru yn awyddus i sicrhau fnad yw’r rheini sy’n gadael eiddo trwyddedig am sigaret yn achosi niwsans cyhoeddus.

Ers cyflwyno’r gwaharddiad ysmygu mewn mannau cyhoeddus caeedig, gwelwyd cynnydd mewn digwyddiadau o niwsans cyhoeddus a chamymddwyn y tu allan i eiddo trwyddedig.

Mae Cyngor Gwynedd a Heddlu Gogledd Cymru wedi dod at ei gilydd i atgoffa bob trwyddedai fod ganddynt gyfrifoldeb dan Ddeddf Trwyddedu 2003 i sicrhau nad oes digwyddiadau o niwsans cyhoeddus a chamymddwyn yn digwydd y tu allan i’w heiddo.

Dywedodd y Cynghorydd J R Jones, Arweinydd Portffolio Gwarchod y Cyhoedd Cyngor Gwynedd:

“Rydym yn falch iawn for y gwaharddiad ysmygu wedi ei barchu gan drwyddedai ledled y Sir, ac rydym yn diolch iddynt am eu cydweithrediad dros y misoedd diwethaf.

“Er hynny, mae tuedd wedi bod ymhlith rhai ysmygwyr i fynd y tu allan am sigaret, ond ar ôl un neu ddau o ddiodydd yn ormod gallant fod ychydig yn swnllyd ac achosi niwsans i aelodau eraill o’r cyhoedd. Ein bwriad yw gweithio gyda trwyddedai Gwynedd i sicrhau nad yw’r fath ddigwyddiadau yn digwydd y tu allan i dafarndai, clybiau a thai bwyta.”

Mae llythyrau wedi eu hanfon at drwyddedai ledled y Sir yr wythnos yma i’w hatgoffa o’u cyfrifoldeb, ac i adael iddynt wybod y bydd yr Heddlu a’r Cyngor fel yr Awdurdod Trwyddedu yn casglu tystiolaeth o’r digwyddiadau hyn gyda’r posibilrwydd o adolygu trwyddedau eiddo.

"MW!"

GAN /BY RHYS EDWARDS

ARDDANGOSFA LLUNIAU GWARTHEG AGORIAD PREIFAT GORFFENNAF 16 7.30 2007

WEDYN, AGORED I'R CYHOEDD THEN, OPEN TO THE PUBLIC

Bydd yr arddangosfa yn rhedeg tan 4 Awst 2007 a hi fydd cyfraniad Oriel Dafydd Hardy i Wyl Caernarfon

Mae Rhys Edwards wedi bod yn tynnu llun gwartheg ers dros bum mlynedd bellach. Daeth ei brofiad cyntaf o hyn pan brynodd gamera newydd a'i drio ar y peth cyntaf welodd pan gerddodd allan o'r ty. Roedd y diddordeb oedd y gwartheg yn dangos yn y camera yn eu gwneud yn destun arddangosfa gwych.

Meddai Rhys: "Dydi cwn byth yn llonydd, mae defaid yn rhedeg ffwrdd, a dwi'm yn licio cathod, felly'n naturiol, dwi di dod yn ffotograffydd gwartheg."
Mae ei ymgais i gael y llun perffaith o fuwch wedi cymryd Rhys mor bell â Llanerchymedd a Phenryndeudraeth. Ei uchelgais yw cael ei fuwch ei hun.

Mae Rhys Edwards yn gweithio fel dyn camera gyda S4C,ac mae'n gweithio o Gaernarfon

(Wnewch chi yrru y gwahoddiad 'ma i bobl eraill gyda diddordeb yng Nhgelf, os gwelwch yn dda? Diolch yn fawr.)

2 Gorffennaf 2007

CYFLE TENANTIAID

Beth mae tenantiaid ei ddisgwyl gan un o landlordiaid blaenaf Gwynedd ac Ynys Môn a pha wasanaethau y mae’r landlord yn eu cynnig i’r tenantiaid?

Dyna’r cwestiwn gaiff ei wyntyllu mewn cyfres i gyfarfodydd a gynhelir yr wythnos nesaf gan Gymdeithas Tai Eryri.

“Mae pob un o denantiaid y 1,700 o’r cartrefi a reolir gan Gymdeithas Tai Eryri wedi cael gwadd i’r cyfarfod sydd mwyaf hwylus iddyn nhw fel y gallent ddweud pa fath o wasanaethau y maent yn ei ddisgwyl gan y Gymdeithas,” meddai Cyd-lynydd Gwella Gwasanaeth Cymdeithas Tai Eryri, Elliw Llyr.

“Cawn ninnau’r cyfle i hysbysu’r tenantiaid o’n hymdrechion parhaus i sicrhau eu bod yn bwy mewn cymunedau cyfforddus a diogel,” ychwanegodd.

Cynhelir y cyfarfodydd yn y mannau canlynol:

Porthmadog (Y Ganolfan) – prynhawn dydd Llun, Gorffennaf 9, 2007, 2.00 - 4.00 o’r gloch Pwllheli (Canolfan Fron-deg) – nos Lun, Gorffennaf 9, 2007. 6.00 - 8.00 o’r gloch Caernarfon (Ty Ni, Ty Chi, 23 Cae Llwybr) – prynhawn dydd Mawrth, Gorffennaf 10, 2007, 5.00 -7.00 o’r gloch Llangefni (Ty Pwt, Cymunedau’n Gyntaf, Cyn Ysgol y British ) – prynhawn dydd Mercher, Gorffennaf 11, 2007, 2.00 - 4.00 o’r gloch

Bydd lluniaeth ysgafn ar gael yn ystod y cyfarfodydd.

2 Gorfennaf 2007

Ymestyncynllun arloesol i helpu trigolion Gwynedd

Trigolion Pwllheli fydd y diweddaraf i allu manteisio ar brosiect arloesol sy’n cynnig cyfle i berchnogion tai yng Ngwynedd wella effeithlonrwydd ynni eu cartrefi.

Gyda’r eisoes wedi targedu cartrefi preifat yn rhannau o Ddyffryn Nantlle, Bangor, Bethesda, Deiniolen, Caernarfon, Blaenau Ffestiniog, Trawsfynydd Clynnog, Llanaelhaearn, Nefyn a Morfa Nefyn, bydd Cyngor Gwynedd, mewn partneriaeth gyda Nwy Prydain yn cynnig y prosiect “Yma i Helpu” i gartrefi Pwllheli o hyn ymlaen.

Bydd y cynllun yn cael ei lansio yn ardal Pwllheli ar ddydd Mercher, 11 Gorffennaf gydag arddangosfa o wybodaeth, yn ogystal â chyfle i drafod gyda swyddogion o Gyngor Gwynedd a Nwy Prydain yn ogystal â’r cwmni sydd wedi eu penodi i ymgymryd â’r gwaith, sef Hillserve Insulation yng Nghanolfan Frondeg rhwng 11am a 4pm.

Fel rhan o’r achlysur, bydd brasfodel o dy yn cael ei ddefnyddio er mwyn arddangos y math o fesurau a ddefnyddir i wella effeithlonrwydd yn y cartref. Bydd pawb sy’n cofrestru ar gyfer y cynllun yn y lansiad ar 11 Gorffennaf yn derbyn bylbiau golau sy’n arbed ynni, yn ogystal â’u cynnwys mewn cystadleuaeth arbennig lle gallant ennill tocyn siopa gwerth £20 neu tegell arbeb ynni.

Dywedodd y Cynghorydd John Wyn Williams, sy’n arwain ar faterion Gofal ar Gyngor Gwynedd:

“Mae prosiect Yma i Helpu yn tanlinellu ymrwymiad y Cyngor i leihau nifer y tai sy’n dioddef o dlodi tanwydd. Rydym wedi ymrwymo i roi trigolion Gwynedd yn gyntaf, ac fel rhan o’r prosiect blaengar yma, mae nifer o drigolion y Sir eisoes wedi cael gwirio effeithlonrwydd ynni eu tai, a hynny yn rhad ac am ddim. Bydd cyfle bellach i drigolion Pwllheli ymuno yn y cynllun, a gobeithio y bydd nifer ohonynt yn gallu elwa.”

Nid yw’r fenter Yma i Helpu, sydd wedi ei ariannu ar y cyd rhwng Cyngor Gwynedd a Nwy Prydain, yn costio unrhyw beth i gartrefi sy’n cymryd rhan, a bydd yn lleihau nifer y trigolion sy’n byw mewn tlodi tanwydd – sef cartrefi lle mae mwy na 10% o incwm y cartref yn cael ei wario ar danwydd.

Nid oes gofyn i berchnogion tai sy’n cymryd rhan yn y prosiect fod yn gwsmeriaid Nwy Prydain, na hyd yn oed gael cyflenwad nwy yn y ty er mwyn bod yn gymwys. Bydd pob cartref yn yr ardal ddewisedig yn derbyn llythyr gan Nwy Prydain yn eu gwahodd i gymryd rhan, ac yna byddant yn derbyn cais i ymgymryd ag arolwg gyda’r cwmni sy’n ymgymryd â’r gwaith, sef Hillserve Insulation.

Bydd cartrefi sy’n gymwys am fesurau gwella effeithlonrwydd yn cael cynnig insiwleiddio ceudod y waliau, insiwleiddio’r llofft a siacedi tanc dwr poeth, wedi ei ariannu gan Gyngor Gwynedd a Nwy Prydain.

Ychwanegodd Anita Jones, Rheolwraig Datblygu Busnes Nwy Prydain:

“Rydym yn hynod falch fod Cyngor Gwynedd eisiau gweithio gyda ni unwaith eto er mwyn brwydro yn erbyn tlodi tanwydd. Mae ‘Yma i Helpu’ yn unigryw gan ei fod yn dod â’r sector breifat, gyhoeddus a gwirfoddol at ei gilydd, ac rydym yn siwr y bydd yn dod â nifer o fuddion i gartrefi yn ardal Gwynedd."

29 Mehefin 2007

CanolfanPlas Pawb – Gwneud gwahaniaeth!

Mae canolfan arloesol sydd wedi ei chynllunio er mwyn rhoi gwell dechreuad i blant a theuluoedd ardaloedd Peblig a Chadnant o Gaernarfon, wedi ei agor yn swyddogol ddydd Gwener, 29 Mehefin, gan Gadeirydd Cyngor Gwynedd, y Cynghorydd Meinir Owen.

Mae Canolfan Integredig Plant, Plas Pawb, sydd wedi ei leoli ger Ysgol Maesincla, yn darparu amrediad o wasanaethau sy’n ymateb i anghenion plant a rhieni yn lleol.

Mae’r gwasanaethau a ddarperir o’r ganolfan yn cynnwys gwasanaeth gwarchod plant, cynlluniau chwarae dros yr haf, uned asesu dan oed ysgol, yn ogystal â llyfrgell deganau symudol.

Wrth agor y ganolfan yn swyddogol, dywedodd Cadeirydd Cyngor Gwynedd, y Cynghorydd Meinir Owen:

“Rydw i’n falch iawn am y gwahoddiad i agor canolfan Plas Pawb. Braf yw gweld fod gennym yma ganolfan integredig ar gyfer plant sy’n cynnig ystod hynod eang o wasanaethau hanfodol i blant lleol a’u rhieni.”

Mae Partneriaeth Plant a Phobl Ifanc Gwynedd yn gweld Plas Pawb fel datblygiad allweddol, er mwyn gwneud gwahaniaeth gwirioneddol yn yr ardal. Maent yn ystyried datblygu prosiectau tebyg mewn ardaloedd eraill o Wynedd.

Ychwanegodd Cadeirydd Bwrdd Rheoli Plas Pawb, y Cynghorydd Roy Owen:

“Rydym wedi ymrwymo’n llwyr i sicrhau fod pob plentyn ledled Gwynedd yn cael y dechreuad gorau mewn bywyd. Ein bwriad yw gweithio gyda rhieni ac asiantaethau i ddarparu amrywiaeth o wasanaethau newydd sydd wedi eu hadnabod gan deuluoedd er mwyn sicrhau’r dechreuad gorau i’w plant a’u teuluoedd.”

Yn ogystal â darparu amrediad cyffrous o brofiadau newydd a chymorth ar gyfer plant lleol, mae Plas Pawb yn cynnig cyfleoedd newydd ar gyfer rhieni yn yr ardal hefyd, a bydd yn darparu sgiliau newydd ar gyfer rhieni trwy amrywiaeth eang o gyrsiau a fydd yn cael eu cynnig yn y ganolfan.

Mae’r ganolfan wedi ei datblygu trwy arian gan nifer o gyrff, gan gynnwys grantiau gan y Gronfa Loteri Fawr, y Cynulliad Cenedlaethol, Dechrau’n Deg a Cymorth.

Rheolir Plas Pawb gan Dîm Rheoli, sy’n cynnwys cynrychiolwyr o amrediad o gyrff statudol a chyrff gwirfoddol yn ogystal â chynrychiolwyr o rieni lleol.

26 Gorffennaf 2007

CYNGOR GWYNEDD YN AGOR DRYSAU IBOBL IFANC LLEOL

Bydd Cyngor Gwynedd yn agor ei ddrysau i oddeutu 60 o bobl ifanc lleol ar ddydd Gwener, 29 Mehefin, fel rhan o Weithdy Cabinet sy’cael ei drefnu mewn partneriaeth gyda Gyrfa Cymru.

Pwrpas y Gweithdy Cabinet yw rhoi’r cyfle i bobl ifanc dreulio’r diwrnod yn swyddfeydd y Cyngor er mwyn dysgu mwy am waith Cyngor Gwynedd.

Yn yr achos yma, bydd disgyblion Blwyddyn 12 Ysgol Syr Hugh Owen, Caernarfon yn cael cyfle i ystyried a thrafod mewn grwpiau y gwahanol fathau o faterion heriol a phenderfyniadau anodd sydd yn cael eu gwneud gan gynghorwyr a swyddogion y Cyngor yn ddyddiol. Bydd y Gweithdy Cabinet hefyd yn rhoi gwybodaeth i’r bobl ifanc am y math o gyfleoedd gwaith sydd ar gael o fewn y Cyngor ar ôl iddynt adael yr ysgol, goleg neu brifysgol.

Dyma’r tro cyntaf i Gyngor Gwynedd gynnal Gweithdy Cabinet mewn cydweithrediad â Gyrfa Cymru.

Dywedodd Iwan Trefor Jones, Cyfarwyddwr Strategol Datblygu Cyngor Gwynedd:

“Rydym yn hynod falch i allu cydweithio gyda Gyrfa Cymru i drefnu’r digwyddiad cyffrous hwn ar gyfer disgyblion hyn Ysgol Syr Hugh Owen. Er bod pobl ifanc yn ymwybodol am rhai o wasanaethau’r Cyngor fel ysgolion, llyfrgelloedd, cartrefi henoed a chasglu sbwriel, rydym yn awyddus defnyddio’r Gweithdy Cabinet fel cyfrwng i godi eu hymwybyddiaeth am yr amrediad eang iawn o wasanaethau sy’n cael eu darparu gan y Cyngor.

“Rydym hefyd yn awyddus rhoi gwybod iddynt am y mathau o gyfleon waith sydd yn bodoli o fewn y Cyngor i bobl ifanc lleol, megis y Cynllun Hyfforddeion Proffesiynol, yn y gobaith y byddent yn ystyried gwneud cais am swydd gyda’r Cyngor wedi iddynt adael yr ysgol, coleg neu brifysgol.

Ychwanegodd Ffiona Williams, Uwch Reolydd Gyrfa Cymru Gogledd Orllewin:

“Er fod llawer o sôn am ddiffyg cyfloedd gwaith da i bobl ifanc, mae’r Cyngor yn awyddus iawn i ddenu rhagor o weithwyr i rai meysydd gwaith.

“Mae Gyrfa Cymru felly yn falch iawn o gael y cyfle i gydweithio gyda’r Cyngor i gyflwyno’r gweithdy hwn fydd yn rhoi cyfle i bobl ifanc Ysgol Syr Hugh Owen ystyried eu cam nesaf yn ofalus a dysgu mwy am wahanol gyfloed yn lleol a allai sicrhau bod ganddynt lwybr gyrfa addas at y dyfodol.”

Bwriad Cyngor Gwynedd a Gyrfa Cymru yw cynnal Gweithdy Cabinet yn flynyddol a gwahodd pob ysgol uwchradd i fynychu gweithdy yn eu tro.